ហ្វីជី៖ ដែនកោះហ្វីជី (Fiji) មានគម្រោងផែនការក្នុងការបើកទទួលស្វាគមន៍ភ្ញៀវទេសចរណ៍អន្តរជាតិឡើងវិញចាប់ពីខែវិច្ឆិកានេះ ដែលជាផ្នែកមួយនៃការស្តារសេដ្ឋកិច្ចដែលរងការផលប៉ះពាល់ខ្លាំងដោយសារជំងឺរាតត្បាតកូវីដ-១៩ ខណៈប្រទេសនេះកំពុងបន្តប្រយុទ្ធយ៉ាងសកម្មជាមួយការផ្ទុះឡើងនូវជំងីកូវីដ-១៩ បំលែងខ្លួនថ្មីប្រភេទ ដែលតា (Delta-variant)។

ក្នុងសេចក្តីថ្លែងការមួយរបស់លោកនាយករដ្ឋមន្រ្តី Frank Bainimarama កាលពីសប្តាហ៍មុនបានបញ្ជាក់ថា គោលដៅចំបងនៅពេលនេះគឺការរំដោះប្រទេស និងសង្គ្រោះផ្នែកសេដ្ឋកិច្ចចេញពីផលប៉ះពាល់ដោយសារកូវីដ-១៩ កន្លងមក។ គួរបញ្ជាក់ថា ផែនការនៃការស្វាគមន៍ភ្ញៀវទេសចរណ៍បរទេសឡើងវិញនេះ ក្រោយពីហ្វីជីបានចាក់វ៉ាក់សាំងលើប្រជាជនខ្លួនបានប្រមាណ ៨០ភាគរយរួចរាល់ ដែលក្នុងនោះមានប្រមាណ ៦៦ភាគរយបានទទួលវ៉ាក់សាំងទាំងពីរដូសពេញលេញ។ រដ្ឋាភិបាលកោះហ្វីជីរបស់លោកនាយករដ្ឋមន្រ្តី Bainimarama មានផែនការជំរុញឱ្យមានការផ្តល់វ៉ាក់សាំង ១០០ភាគរយលើប្រជាជនសរុប ៩០ម៉ឺននាក់ នៅត្រឹមថ្ងៃទី០១ ខែវិច្ឆិកាខាងមុខនេះ។ 

គួរបញ្ជាក់ថា សម្រាប់ការត្រៀមទទួលស្វាគមន៍ភ្ញៀវទេសចរណ៍ឡើងវិញនេះ រដ្ឋាភិបាលហ្វីជីមានគោលបំណងក្នុងការលើកលែងនូវលក្ខខណ្ឌតម្រូវធ្វើចត្តាឡីស័ក (Quarantine-Free) ទៅលើភ្ញៀវទេសចរណ៍ទាំងឡាយណាដែលបានធ្វើដំណើរមកពីប្រទេសដែលស្ថិតក្នុងបញ្ជី "ពណ៌បៃតង" របស់រដ្ឋាភិបាល។ ដោយឡែក ប្រទេសដែលស្ថិតក្នុងបញ្ជីពណ៌បៃតងរបស់រដ្ឋាភិបាលហ្វីជីរួមមានដូចជា អូស្រ្តាលី, ណូវែលហ្សេឡង់, ជប៉ុន, កាណាដា, កូរ៉េខាងត្បូង, សិង្ហបុរី និងផ្នែកខ្លះនៃសហរដ្ឋអាមេរិកជាដើម។ អ្នកដំណើរជាភ្ញៀវទេសចរណ៍បរទេសទាំងនោះមិនតម្រូវឱ្យមានការធ្វើចត្តាឡីស័កនោះឡើយ ពោលគឺពួកគេគ្រាន់តែត្រូវមានវ៉ាក់សាំងបង្ការកូវីដ-១៩រួចរាល់ និងមានលទ្ធផលតេស្តអវិជ្ជមានពេលមកដល់អាកាសយានដ្ឋានរបស់ហ្វីជី៕